Tez-tez verilən suallar
Pasiyentlərimizin ən çox verdiyi suallar və onlara cavablarımız. Sualınızın cavabını tapmadınızsa, bizə yazın.
Qəbul və qeydiyyat
Qəbula necə yazıla bilərəm?
Qəbullar yalnız öncədən qeydiyyatla aparılır. Əlaqə nömrələrimizə zəng edərək, WhatsApp yazaraq və ya Instagram-da birbaşa mesajla (DM) qeydiyyatdan keçə bilərsiniz. Həkimə vaxtında çatmaq üçün əvvəlcədən yazılmağınız vacibdir.
İlk qəbul necə keçir?
Əvvəlcə həkim sizi dinləyir — şikayətlərinizi, ağrının nə vaxt başladığını öyrənir. Sonra bədən bütöv şəkildə müayinə olunur: duruş, onurğa, çanaq və hərəkətlilik qiymətləndirilir. Vertikal (ayaqüstə) və horizontal (uzanıqlı) müayinədən sonra diaqnoz qoyulur və fərdi müalicə planı hazırlanır. Plan sizinlə razılaşdırılır.
Evə çıxış xidmətiniz varmı?
Bəli. Müəyyən səbəblərdən mərkəzə gələ bilmirsinizsə, evə baş çəkib lazımi prosedurları və ya fizioterapiyanı həyata keçirə bilərik. Şərtləri əlaqə nömrəsindən dəqiqləşdirin.
Hansı sənədləri özümlə gətirməliyəm?
Mövcud rentgen, MRT, KT nəticələriniz və əvvəlki həkim rəyləriniz varsa, mütləq özünüzlə gətirin. Bu, müayinəni sürətləndirir və müalicə planını dəqiqləşdirir.
Osteopatiya haqqında
Osteopatiya prosedurları ağrılıdır?
Xeyr. Bacarıqlı osteopatın bütün texnikaları yumşaq və ağrısızdır. Heç bir kobud manipulyasiya edilmir. Seansdan sonra yüngül narahatlıq ola bilər — bu, orqanların yenidən qurulması ilə bağlıdır və ağrı ilə qarışdırılmamalıdır.
Neçə seans lazımdır?
Seans sayı fərdi olaraq dəyişir. Funksional problemlərdə bəzən 1–3 seans kifayət edir. Skolioz, kifoz və lordoz kimi struktur problemlərdə isə 10 günlük intensiv proqramla gözlə görünən dəyişiklik əldə etmək mümkündür. Dəqiq say müayinədən sonra müəyyən olunur.
Seansdan sonra özümü pis hiss edə bilərəmmi?
İlk seansdan sonra bədən iki cür reaksiya verə bilər: yüngüllük və rahatlama, yaxud yorğunluq, yüngül ağrılar, bəzən temperatur artımı. Hər iki reaksiya normaldır və 2–3 gün ərzində keçib gedir — bu, bədənin tarazlığa qayıtmağa başladığını göstərir.
Osteopat masajçıdırmı?
Xeyr. Osteopat əvvəlcə bədəni bütöv şəkildə yoxlayır və ağrının haradan gəldiyini tapır. Masaj isə müalicə planının yalnız bir komponentidir. ELF Center-də bütün osteopatik həkimlər ali tibb təhsilinə malikdir.
Osteopat «fəqərəni yerinə salır»?
Xeyr — belə bir anlayış yoxdur. Fəqərələr nə yerindən çıxır, nə də əllə yerinə salınır. Osteopat sümüklərlə deyil, əzələlər, fasyalar və sinir sistemi ilə işləyir. Gərginlik aradan qalxdıqda fəqərələr özləri təbii hərəkətinə qayıdır.
Seans zamanı yuxuya getmək normaldırmı?
Tamamilə normaldır. Terapiya zamanı bədən rahatlaşır və sinir sistemi stressdən çıxır. Yuxu bu prosesin təbii hissəsidir və müalicənin effektivliyini artırır.
Uşaqlar
Uşağı osteopata neçə yaşdan aparmaq olar?
İstənilən yaşdan — hətta yenidoğulmuşdan. Osteopatiya körpələr üçün zərif və qayğıkeş əllərlə mülayim müalicəvi təmas metodikasıdır və hətta zəif yenidoğulmuşlara da uyğundur.
Uşağın ağrısı yoxdursa, osteopata aparmağa dəyərmi?
Bəli. Qamət pozuntuları, ayaq problemləri, boyun və bel gərginlikləri çox vaxt hiss olunmadan formalaşır. Vaxtında yoxlanış gələcəkdə yarana biləcək problemlərin qarşısını almağa kömək edir. Profilaktika həmişə müalicədən asandır.
Skolioz «böyüyəndə keçir»?
Xeyr — bu, skolioz haqqında ən təhlükəli mifdir. Skolioz uşaq böyüdükcə öz-özünə düzəlmir; əksinə, sürətli boy artımı dövründə əyrilik daha da arta bilər. Amma vaxtında müdaxilə olunarsa, prosesi dayandırmaq mümkündür.
Uşağıma supinator və ortopedik ayaqqabı almalıyam?
Ortopedik ayaqqabı yalnız həkim tərəfindən, ətraflı müayinədən sonra və sifarişlə təyin olunur. 6 yaşına qədər supinator və yüksək arxalıqlı ayaqqabı ayaqda hərəkət məhdudiyyəti yaradır, təbii əzələ və skelet inkişafını ləngidir. Ayaqyalınlıq və aktivlik uşaq ayaqlarının sağlamlığının açarıdır.
Skolioz dərəcəsini izləmək üçün hər dəfə rentgen lazımdır?
Xeyr. Skolioz Akademiyasında dərəcə ölçmək üçün skoliozmetr tətbiq edilir — bu, xüsusilə uşaqlarda təkrar şüalanmanın qarşısını alır.
Onurğa və disk yırtığı
Disk yırtığı əməliyyatsız müalicə oluna bilərmi?
Çox vaxt bəli. Əməliyyat tələb edən hallar: at quyruğu (cauda equina) sindromu, ayaqda sürətlə artan zəiflik, ekstruziya (yırtığın qopması), sinir köklərinin kəskin sıxılması və spinal kanalın daralması. Qərarı yalnız həkim müayinədən və görüntüləmədən sonra verir.
Hansı əlamətlərdə növbə gözləmədən təcili həkimə getmək lazımdır?
Aşağıdakı əlamətlərin BİRİ belə varsa, bu, təcili tibbi haldır — osteopatiya və ya fizioterapiya üçün növbə gözləməyin, dərhal təcili yardıma və ya neyrocərraha müraciət edin: sidiyi və ya nəcisi saxlaya bilməmək, sidik ifrazının çətinləşməsi; oturaq nahiyəsində, cinsiyyət orqanları ətrafında və budun daxili hissəsində keyimə (yəhər tipli keyimə); iki ayağın eyni vaxtda güclə zəifləməsi; ayağın sürətlə iflic olması; yüksək hərarət və ya izahsız arıqlama ilə birlikdə gecə ağrıları; xərçəng keçirmiş şəxsdə yeni bel ağrısı; yıxılma və ya zərbədən sonra başlayan kəskin ağrı.
Yırtığın ölçüsü azalırmı?
Düzgün müalicə və reabilitasiya alan pasiyentlərin çoxunda yırtığın ölçüləri azala bilər. Adətən bu, 6–12 aydan tez baş vermir. Kəskin dövrdə müalicənin məqsədi sinir sıxılmasının və iltihabın aradan qaldırılmasıdır.
MRT təmizdir, amma belim ağrıyır — səbəb nə ola bilər?
Funksional gərginliklər MRT və rentgendə görünmür. Səbəb əzələ və bağlarda gərginlik, fasial sıxılma, oma (sakroiliak) bloklanması, duruş problemləri, stress və hətta həzm sistemi problemləri ola bilər. Osteopatik manual müayinə bu blokları aşkar edir.
Turnikdən sallanmaq faydalıdırmı?
Xeyr. Turnikdən sallanmaq onurğaya nəzarətsiz dartılma yükü salır və protruziyanı disk yırtığına çevirə bilər. Dartılma prosedurları yalnız mütəxəssis nəzarəti altında edilməlidir.
Diaqnostika
So-Check analizi necə keçir?
Ovucun 4 nöqtəsi skaner edilir. Analiz qan götürmədən, iynəsiz və ağrısız aparılır; nəticə bir neçə dəqiqəyə hazır olur. Vitaminlər, minerallar, ağır metallar və oksidləşdirici stress səviyyəsi qiymətləndirilir.
So-Check nəticəsi laborator analizi əvəz edirmi?
So-Check hüceyrədaxili vəziyyəti göstərən funksional diaqnostikadır. Nəticələr həkim tərəfindən şərh olunur və lazım gəldikdə əlavə laborator müayinələr təyin edilir.
Qiymət və ödəniş
Qiymətləriniz nə qədərdir?
Qiymət seçilən prosedura, seans sayına və filiala görə dəyişir. Ən dəqiq və güncəl qiyməti əlaqə nömrələrimizdən öyrənə bilərsiniz. Mərkəzimizdə mütəmadi olaraq kampaniyalar keçirilir.
Hədiyyə kuponu varmı?
Bəli — mərkəzimizdə sağlamlıq kuponları təqdim olunur. Şərtləri və nominalları əlaqə nömrəsindən dəqiqləşdirin.
Sualınıza cavab tapmadınız?
Bizə yazın — mütəxəssislərimiz cavablandıracaq.